Emparament de donades

Mejançant aguest avís d'emparament de donades, er Institut d'Estadistica de Catalonha (Idescat) vò facilitar un accès agil e rapid as principaus informacions restacades damb es tractaments de donades qu'amie a tèrme e damb es drets qu'assistissen as persones interessades, entà que poguen contrarotlar de manèra efectiva es sues donades personaus.

2. Responsable deth tractament

Eth responsable deth tractament des donades ei er Institut d'Estadistica de Catalonha, qu'a era sua sedença en Via Laietana, 58, 08003 Barcelona.

• Tel. centraleta: +34 93 557 30 00
• NIF: Q5850015H
• sasg arrova idescat punt cat

3. Emparament e tractament de donades de caractèr personau

Idescat, entà desvolopar era sua activitat, a de besonh tractar donades de caractèr personau. Eth tractament d'aguestes donades s'amie a tèrme cossent damb çò que dispòse eth Reglament (UE) num. 2016/679 deth Parlament Europèu e deth Conselh, de 27 d'abriu de 2016, tocant ar emparament des persones fisiques en çò que tanh ath tractament de donades personaus e ara liura circulacion d'aqueres donades e peth quau s'abolís era Directiva 95/46/CE (Reglament generau d'emparament de donades, RGPD) e era Lei organica 3/2018, de 5 de de deseme, d'emparament de donades personaus e garantia des drets digitaus (LOPDGDD)

Er Idescat garentís era proteccion des donades personaus que tracte, tant s'an estat facilitades pera persona interessada coma s'an estat obtengudes d'autes hònts, e aplique es mesures de besonh entà garentir-ne era seguretat. Es donades personaus non se cedissen, exceptat qu'ua lei ac autorize.

Es donades qu'er Idescat tracte entath desvolopament dera sua activitat estadistica son protegides, ath delà, pes garentides deth secrèt estadistic, cossent damb es previsions dera Lei 23/1998, de 30 de deseme, d'estadistica de Catalonha (LEC).

4. Lista des activitats de tractament

En aguest apartat podetz consultar era informacion relativa as tractaments de donades qu'amie a tèrme er Idescat.

Registre d'activitats de tractament

Darrèra revision: junh 2024

• Activitats administratives
• Activitats estadistiques

5. Drets des persones (drets d'autodeterminacion informativa)

Dret d'accès

Er interessat a dret de saber s'eth responsable deth tractament tracte donades personaus sues e, s'ei atau, a dret a accedir ad aqueres donades e a obtier era informacion següenta:

• Era tòca deth tractament, es categories de donades personaus que se tracten e es destinataris o es categories de destinataris as quaus s'an comunicat o se comunicaràn es donades.
• Eth termini previst de conservacion des donades personaus o es critèris utilizadi entà determinar-lo.
• Eth dret de sollicitar ath responsable deth tractament era rectificacion o era supression des donades, era limitacion deth tractament o eth dret d'opausar-se-i.
• Eth dret a presentar ua reclamacion deuant ua autoritat de contraròtle.
• Era origina des donades, quan non s'an obtengut der interessat.
• Era existéncia de decisions automatizades, includida era elaboracion de perfils, era logica aplicada e es conseqüéncies d'aqueth tractament.
• En cas de transferéncies internacionaus de donades, es garanties adequades que s'aufrissen.

Er interessat a dret a obtier ua còpia gratuïta des donades que son objècte deth tractament. Entà còpies posteriores, se pòt establir un canon segons es còsti administratius. Se se sollicite per mejans electronics, er interessat a dret d'arrecéber era informacion en madeish format.

Restriccion ath dret d'obtier còpia: se prejudície es drets de tresaus.

Dret de rectificacion

Ei restacat ath caractèr inexacte o incomplèt des donades.

Er interessat a dret a rectificar es sues donades personaus inexactes e que se complèten es que siguen incompletes, quitament mejançant ua declaracion addicionau.

Eth responsable a de comunicar era rectificacion a cadun des destinataris ath que li a comunicat prèviament es donades, levat que li sigue impossible o qu'exigisque esfòrci desproporcionadi. S'er interessat ac sollicite, eth responsable a d'identificar as destinataris.

Dret de supression (o dret de desbrembe)

Eth RGPD incorpòre eth dret de desbrembe, coma un dret restacat ath dret de supression des donades.

Er interessat a eth dret d'obtier era supression des sues donades personaus (dret de desbrembe), quan:

• Es donades ja non son de besonh entara fin que s'arremassèren.
• Se revòque eth consentiment sus eth que se basaue eth tractament.
• Er interessat s'opause ath tractament.
• Es donades s'an tractat illicitament.
• Es donades les cau suprimir entà complir ua obligacion legau.

Quan eth responsable a hèt publiques es donades personaus e les cau suprimir, a d'adoptar mesures rasonables entà informar dera supression ara rèsta de responsables que tracten aqueres donades.

Eth responsable a de comunicar era supression a cadun des destinataris, levat que sigue impossible o exigisque esfòrci desproporcionadi. S'er interessat ac sollicite, eth responsable a d'identificar as destinataris.

Excepcions ar exercici deth dret de supression:

• Er exercici deth dret ara libertat d'expression e informacion
• Eth compliment d'ua obligacion legau
• Era existéncia de fins d'archiu en interès public, de recèrca scientifica o istorica o fins estadistiques
• Era formulacion, er exercici o era defensa de reclamacions

Dret d'oposicion

Er interessat a dret d'oposar-se ath tractament des sues donades personaus, quan:

• Eth tractament se base en interès public o er exercici de poders publics conferidi ath responsable, o en interès legitim perseguit peth responsable deth tractament o per un tresau. En aguest cas, era oposicion la cau fonamentar sus es arrasons restacades damb era sua situacion personau.
• Eth responsable deth tractament les a de quitar de tractar, levat qu'eth responsable acredite un interès legitim que prevaugue sus eth der interessat o sigue de besonh entà exercir o deféner reclamacions.
• Eth tractament a per objècte eth marqueting dirècte, includida era elaboracion de perfils restacadi damb aqueth marqueting.
• Eth tractament a fins estadistiques o de recèrca scientifica o istorica e s'invòque ua arrason restacada damb era sua situacion personau.

Dret ara limitacion deth tractament

Era persona interessada a dret que se mèrquen es sues donades de caractèr personau conservades, damb era fin de limitar-ne eth tractament en futur. Era limitacion deth tractament implique que, a peticion dera persona interessada, es sues donades personaus se quiten de tractar.

Cau non confóner damb eth blocatge de donades dera Lei organica 15/1999, de 13 de deseme, d'emparament de donades de caractèr personau (LOPD).

Era limitacion se pòt sollicitar quan:

• Era persona interessada a exercit es drets de rectificacion o oposicion e en cas qu'eth responsable determine s'esquè atier era sollicitacion.
• Eth tractament ei illicit, hèt que determinarie era supression des donades, mès er interessat s'opause ara supression.
• Es donades ja non son de besonh entath tractament, hèt que determinarie era supression des donades, mès er interessat s'opause ara supression pr'amor que les a de besonh entà formular, exercir o deféner reclamacions.

Mentre dure era limitacion, eth responsable solament pòt tractar es donades afectades, ath delà de conservar-les, enes casi següents:

• Damb eth consentiment dera persona interessada
• Tà formular, exercir o deféner reclamacions
• Tà protegir es drets d'ua auta persona fisica o juridica
• Per arrasons d'interès public importantes, dera Union o der Estat membre corresponent

Eth responsable a de comunicar era limitacion a cadun des destinataris as quaus a comunicat es donades, levat que sigue impossible o exigisque esfòrci desproporcionadi. S'er interessat ac sollicite, eth responsable a de d'identificar as destinataris.

Dret ara portabilitat des donades

Er interessat a dret d'arrecéber es sues donades personaus qu'a facilitat a un responsable deth tractament en un format estructurat, d'usatge comun e de lectura mecanica, e a transmeter-les a un aute responsable, se se complissen es requisits següents:

• Eth tractament se base en consentiment o en un contracte.
• Eth tractament se hè per mejans automatizats.

D'un aute costat, aguest dret non se pòt exercir quan eth tractament se fonamente en compliment d'ua mission d'interès public o inerenta ar exercici deth poder public.

Manèra d'exercir es drets

Podetz accedir as vòstes donades, rectificar-les o suprimir-les, opausar-vos ath tractament e sollicitar-ne era limitacion e era portabilitat en tot manar era vòsta sollicitacion ara adreça postau der Idescat (Via Laietana, 58, 08003 Barcelona) o per mejans electronics a trauès dera peticion generica disponibla en Tramits gencat.

Era presentacion dera sollicitacion per mejans electronics requerís disposar de certificat electronic o ben deth sistèma alternatiu d'identificacion idCat Mobil. Vos cau indicar claraments ena vòsta sollicitacion quin dret o quini drets exercitz.

Era legislacion de proteccion de donades preve que se poguen denegar es sollicitacions d'exercici d'aguesti drets quan es donades siguen ara emparada des garentides deth secrèt estadistic previstes ena legislacion estadistica (article 25.3 LOPDGDD).

Er Idescat vos informarà sus es accions derivades dera vòsta peticion en relambi d'un mes, que, se se tracte de sollicitacions mès que mès complèxes, se pòt agranir a dus mesi mès (donques, enquia un maximal de tres mesi). En aguest darrèr cas, s'arrepòrte er ampliament deth termini laguens deth prumèr mes.

Se consideratz que non auem dat ua responsa avienta ara vòsta sollicitacion, podetz presentar ua reclamacion deuant era Autoritat Catalana d'Emparament de Donades o exercir accions judiciàries.