Sautar ath contengut principau

1. Qué ei eth Sondatge d'usatges lingüistics dera populacion 2018?

Eth Sondatge d'usatges lingüistics dera populacion 2018 (EULP 2018) ei ua activitat estadistica oficiau integrada en Programa annau d'accion estadistica corresponent (accion 04 05 01), que desvolòpe era lei deth Plan estadistic de Catalonha 2017–2020. Es organismes responsables son eth Departament de Cultura, per miei dera Direccion Generau de Politica Lingüistica, e er Idescat.

Er EULP 2018 ei era quatau edicion dera Estadistica d'usatges lingüistics en Catalonha, que ja se hec enes ans 2003, 2008 e 2013. Ena edicion de 2013 s'incorporèc Internet coma naua via de collectatge dera informacion.

2. Quini son es objectius?

Er objectiu principau der EULP 2018 ei de conéisher era identificacion lingüistica e es usatges deth catalan e des autes lengües enes diuèrsi espacis de relacion personau dera populacion en Catalonha, damb especiau interès pera situacion der usatge deth catalan. Era elaboracion d'aguesta estadistica arrespon ath besonh de disposar de donades oficiaus, pr'amor que son de besonh entara planificacion des politiques lingüistiques e entà empréner e avalorar accions en encastre der usatge sociau dera lengua.

Entà arténher aqueri objectius, eth qüestionari deth sondatge amasse informacion enes blòcs tematics següents:

  • Identificacion e residéncia
  • Lengües e coneishences
  • Casa
  • Familha
  • Entorns sociaus
  • Entorns de consum
  • Autovaloracion d'usatge
  • Entorn sociolingüistic
  • Autovaloracion de coneishences
  • Donades sòciodemografiques

Un objectiu segondari, estacat ath hèt de tractar-se d'ua operacion periodica quinquennau, ei observar era evolucion des usatges lingüistics en temps.

3. A qui se demane aguesta informacion?

Eth sondatge s'adrece a persones de 15 ans e mès includides en Registre de populacion de Catalonha eth 1r de gèr deth 2018. S'entreviste a ues 9.000 persones de Catalonha repartides per tot eth territòri.

4. Quina ei era hònt d'a on proven era mòstra d'entrevistadi?

Entà seleccionar as entrevistadi s'a utilizat eth Registre de populacion de Catalonha, qu'ei un registre administratiu a on figuren es donades actualizades de caractèr obligatòri des ciutadans inscriti enes recensaments municipaus d'abitants de toti es ajuntaments de Catalonha. Aqueth registre ei susvelhat per Idescat e regulat pera Lei d'estadistica de Catalonha.

5. Com se seleccione ara persona entrevistada?

Se seleccione per miei d'ua mòstra aleatòria estratificada, que consistís a escuélher ar azard un nombre redusit de persones que representen Catalonha tota per territòri de residéncia. Tanben i a ua mòstra representativa entà Aran, pr'amor dera sua especificitat lingüistica.

Entà garantir qu'era mòstra seleccionada sigue eth rebat exacte dera populacion generau, ei fòrça important que totes es persones seleccionades participen en sondatge.

6. Ei confidenciau era informacion que se demane?

Es donades de caractèr individuau deth sondatge son emparades peth secrèt estadistic enes tèrmes establidi pera Lei d'estadistica de Catalonha. Açò supause qu'es donades individualizades arremassades enes qüestionaris non se pòden hèr publiques ne tanpòc non se pòden comunicar a cap de persona o entitat, ne as administracions publiques, exceptades aqueres que tanben seràn restacades pera obligacion deth secrèt estadistic. En aguest sens, tot eth personau der Idescat e d'auti organismes que participen a ua estadistica oficiau en Catalonha hèn ua declaracion solemna de preservacion deth secrèt estadistic e s'afronten a penes sevères en cas de violar-lo.

Egalaments, era obligacion de preservar eth secrèt estadistic s'esten ara publicacion des resultats, de sòrta que tant er Idescat coma era rèsta d'organismes deth Sistèma estadistic de Catalonha an un suenh especiau tà evitar que se poguen dedusir donades de caractèr individuau dera informacion que se publique tabulada.

7. Ei obligatòria era responsa?

A causa deth caractèr d'interès public, fixat peth Parlament de Catalonha, de totes es estadistiques integrades en Plan estadistic de Catalonha, era collaboracion dera populacion e des enterpreses ena responsa des qüestionaris ei legauments obligatòria, damb era tòca d'assegurar ua quòta adequada de responses e, per tant, uns resultats estadistics fiables (capítol V dera Lei d'estadistica de Catalonha).

8. Com se hè eth sondatge?

Eth sondatge s'amie a tèrme mejançant ua metodologia combinada de qüestionari per Internet, entrevista telefonica e entrevista presenciau, segons era preferéncia dera persona entrevistada.

S'era persona entrevistada escuelh arrespóner eth qüestionari per Internet (CAWI), li cau utilizar eth nòm d'usatgèr e eth senhau provedidi ena letra de presentacion der EULP 2018 qu'a arrecebut prèviaments per corrèu ordinari. Se se contacte telefonicaments, se harà ua entrevista telefonica auxiliada per ordenador (CATI). E se non se la localize per miei deth telefòn, se visitarà era casa dera persona seleccionada entà hèr era entrevista presenciau damb ajuda d'ordenador (CAPI). En aguest cas, eth sondaire portarà inexcusablaments ua credenciau expedida per Idescat (damb era sua fotografia, nòm e cognòms, numèro deth document nacionau d'identitat e eth còdi d'identificacion der entrevistaire) qu'aurà de mostrar as persones qu'arresponeràn eth sondatge.

9. Pòt arrespóner quina persona que sigue dera abitança?

Solament pòt arrespóner era entrevista era persona seleccionada; non ac pòt hèr arrés mès. S'era persona seleccionada non i é, non se pòt entrevistar pas a un aute membre dera casa en sòn lòc.

10. Quan s'amie a tèrme eth trabalh de camp?

Eth trabalh de camp s'amie a tèrme a compdar deth 5 de març de 2018 enquiath mes de seteme.

11. A on pogui demanar mès informacion?

Pendent eth periòde deth trabalh de camp i a disponible un telefòn e ua adreça electronica entà atier es dobtes que poguen aparéisher.

  • Telefòn: 900 400 817
  • Adreça electronica: usoslinguistics arrova idescat punt cat