Accès a donades confidenciaus der Idescat damb finalitats scientifiques

Er Idescat dispause d'un apartat de Microdonades, a on vos podetz descargar microdonades e metadonades de diferentes enquèstes. Conven que consultetz aguest apartat abans de sollicitar er accès a donades confidenciaus damb finalitats scientifiques.

Es investigadors e centres de recèrca acreditadi pòden accedir a donades confidenciaus der Idescat entara sua recèrca, cada viatge qu'es donades non permeten identificar dirèctament es persones fisiques o juridiques implicades (cossent damb era legislacion en vigor en matèria de proteccion de donades e secrèt estadistic).

En aguest apartat s'explique eth procediment que cau seguir e era documentacion requerida entà accedir a donades confidenciaus der Idescat damb finalitats scientifiques.

1. Sollicitacion des donades confidenciaus

Er investigador o centre de recèrca reconeishut prealablament per Eurostat coma tau e que volgue accedir a donades confidenciaus der Idescat a d'adreçar un escrit ar Idescat, d'acòrd damb era Guida de sollicitacion d'accès a donades confidenciaus damb finalitats scientifiques (PDF) e emplir eth formulari corresponent.

Segons aguesta Guida, eth formulari a de contier informacion detalhada sus es elements següenti:

1. Descripcion deth projècte de recèrca
2. Supòrt der organisme o centre de recèrca ath projècte que presente er investigador principau
3. Curriculum des investigadors
4. Garentides fisiques e procedimentaus entath tractament segur des donades confidenciaus

Alavetz, cau emplir eth Formulari entar accès a donades confidenciaus damb finalitats scientifiques (ODT) a compdar des explicacions dera Guida e manar-lo ath servici d'atencion as investigadors der Idescat (SAI), mejançant era adreça sai arrova idescat punt cat.

S'er investigador o centre de recèrca non ei reconeishut per Eurostat o er Idescat coma centre de recèrca, tanben a de emplir eth Formulari entara reconeishença d'entitat de recèrca (ODT) e manar-lo ath servici d'atencion as investigadors der Idescat (sai arrova idescat punt cat) entara sua eventuau omologacion.

2. Avaloracion dera sollicitacion

Un viatge acceptada era sollicitacion, er investigador o centre de recèrca a de signar eth Document de compromés entar accès as donades confidenciaus damb finalitats scientifiques (PDF). Ath delà, toti es investigadors an de signar eth Document de compromís individual de confidencialitat (PDF). Fin finau, er investigador principau a d'acceptar prealablament es còsti derivadi deth tractament des donades confidenciaus que li seràn facilitades.

3. Liurament des donades confidenciaus

Entà accedir as donades, eth servici d'atencion as investigadors der Idescat facilitarà ar investigador es claus e es senhaus entà descargar era informacion, mejançant un canau segur damb un servidor VSFTP (very secure file transfer protocol).

Entà quinsevolha auta recèrca que se volgue amiar a tèrme, damb eth madeish ensems totau o parciau de donades confidenciaus facilitades per Idescat, cau formular ua naua sollicitacion e seguir es madeishi procediments expausadi.

4. Destruccion des donades confidenciaus

Er investigador o centre de recèrca a de destruïr es donades facilitades per Idescat quan s'acabarà eth tèrme entà utilizar-les. Ad aguest efècte, a d'emplir era Declaracion de destruccion de donades confidenciaus damb finalitats scientifiques (PDF) e remeter-la ath SAI.

Er accès, usatge e tractament de donades confidenciaus damb finalitats scientifiques se regule ena legislacion catalana e europèa, e es principaus disposicions ad aguest subjècte se recuelhen mès enjós.

Quinsevolh inacompliment dera normativa establida per part deth personau investigador o centre de recèrca ei subjècte a responsabilitats administratives, sens perjudici des responsabilitats civius e penaus que siguen exigibles deuant dera jurisdiccion ordinària.

Entà mès informacion, contactatz damb eth servici d'atencion as investigadors der Idescat, mejançant era adreça sai arrova idescat punt cat.